Әлеуметтік желілерде «Таразда балға ұстаған маньяк пайда болыпты» деген ақпарат тарады. Ішкі істер министрлігі бұл ақпаратқа қатысты мәлімдеме жасады, деп хабарлайды BAQ.KZ.
Белгілі болғандай, 1 сәуірде қалалық саябақ маңынан басы жаншылған ер адамның мәйіті табылды. Осы жағдайдан соң мессенджерлерде қорқынышты хабарлама тарай бастаған.
«Әлеуметтік желіде «Таразда балға ұстаған маньяк жүр, құрбан болғандар бар» деген ақпарат тарап жатыр. Жамбыл облыстық полиция департаменті бұл ақпараттың шындыққа жанаспайтынын хабарлайды. Облыс орталығындағы шағын аудандардың бірінен ер адамның мәйітінің табылуына қатысты қылмыстық іс тергеліп жатыр», – делінген ІІМ мәлімдемесінде.
Департамент қазір күдіктіні анықтау және ұстау үшін қажетті тергеу-жедел іздестіру шараларының жүргізіліп жатқанын айтты. Тергеу барысы полиция департаменті басшылығының бақылауында екен.
