Әлеуметтік маңызы бар азық-түлік бағасын тұрақтандыру күн тәртібінен түскен жоқ. Бұл жұмысты «Тараз» әлеуметтік-кәсіпкерлік корпорациясы» акционерлік қоғамы тұрақты бақылауында ұстап келеді. Аталған акционерлік қоғамның директоры Манас Беріковтің айтуынша, бүгінгі күні акционерлік қоғам бұл санатқа енген азық-түлік тауарларының бағасын қалыпты жағдайда ұстап тұр.
– Бүгінгі күні Тараз қаласы мен аудандарда әлеуметтік маңызы бар азық-түлік бағасын тұрақтандыру мақсатында «Дәмді себет», «Нұрислам», «Фиркан» сияқты сауда орталық желілерімен, сондай-ақ ірі көтерме-тарату орталықтарымен келісімшарттар жасалды. Бұдан бөлек, аудандар мен Тараз қаласында «Әлеуметтік дүкен» жобасы 2020 жылдан бері жұмыс істеп келеді. Бүгінгі таңда облыста барлығы 19 әлеуметтік павильон халыққа қызмет көрсетуде. Әлеуметтік павильондарда – әлеуметтік маңызы бар азық-түлік тауарлар тізбесіндегі өнімдер нарық бағасынан төмен өткерілуде. Онда әлеуметтік маңызы бар азық-түлік бағасының өсуіне жол бермеу және сауда үстемесін 15 пайыздан асырмау бойынша тұрақтандыру қорымен апта сайын мониторинг және түсіндірме жұмыстары жүргізіліп отырады. Ал дәл қазір Тараз қаласында осындай 11 әлеуметтік дүкен жұмыс істеп тұр. Олар Абай даңғылы бойында, «Бәйтерек» және «Ұлы дала» шағынаудандары мен Қант зауыты, «Аса», «Шөлдала», «Арай» және «Қарасу» шағынаудандарында орналасқан.
Сонымен, әлеуметтік дүкен сөресіне шығарылған ұнның бір килограмы – 150, нан – 90, макарон өнімдері – 290, қарақұмық – 198, күріш – 400, картоп – 130, сәбіз – 95, пияз – 65, қырыққабат – 120, қант – 360, күнбағыс майы – 570, тауық еті – 1200, сүт – 325, айран (2,5 пайыз) – 350, сары май – 1580, жұмыртқа – 48, тұз – 45, сүзбе (5 пайыз) 1150 теңгеден босатылуда. Қарап отырсақ, бұл баға жыл басынан өзгеріссіз сақталып келеді, – дейді Манас Беріков.
Бір атап өтерлігі, әлеуметтік маңызы бар азық-түлік бағалары басқа дүкендерге қарағанда төмен бағада өткеріледі. Бұл санатқа жататын тауар бағалары әлеуметтік дүкендерде әлеуметтік бағада және коммерциялық бағада да сатылымда тұрады. Өйткені, тұтынушы өзіне қажетті тауарды таңдап алуға құқылы.
Жалпы, акционерлік қоғам өкілдерінің айтуынша, «Тараз» әлеуметтік-кәсіпкерлік корпорациясы» акционерлік қоғамының тұрақтандыру қорына сатып алынған әлеуметтік маңызы бар азық-түлік форвард, оффтейк келісімшарттары негізінде өнім өндірушілердің қоймасында сақталады. Форвардтық шарттар мен офтейк-келісімшарттар жасасу кезінде сатушы тауарды ұзақ уақыт сақтауға, меншік немесе жалға алуға жарамды қоймасының болуын қамтамасыз етеді, сондай-ақ тауар толық өткерілгенге дейін оның тиісті сақталуын қамтамасыз етеді, тауарды жеткізу қоймадан жүзеге асырылады. Олардың сақталу жағдайын үнемі «Тараз» ӘКК» АҚ бақылап тұрады.
Диас ҚҰЛИБАЙ,
М.Х.Дулати атындағы Тараз университетінің
журналистика факультетінің 4-курс студенті.