Премьер-Министрдің орынбасары Қанат Бозымбаев «Қазақмыс» Корпорациясы» ЖШС жетекшілерімен кеңес өткізіп, онда ол: «тексеру комиссиясы шахтада алдағы уақытта жұмыс істеу қауіпті ме, жоқ па соны анықтамайынша жұмысын одан ары жалғастыру туралы тіпті де ойларына алмасын» деді.
-Біз осындай қайғылы жағдайларды болдырмау үшін қолдан келгеннің бәрін жасаймыз. Мемлекет басшысы тергеу-тексеруі мұқият жүргізуді тапсырды. Енді құқық қорғау органдары тарапынан болатын экспертизалардың, өнеркәсіп қауіпсіздігі жөніндегі комитеттің тексерулерінің, өздеріңнің еңбек инспекторларыңның тарапынан да қатаң сұралады. Сендердің міндеттерің осы төтенше жағдайға кім кінәлі, кемшілік кімнен кетті, соны анықтау, — деді Қанат Бозымбаев компания жетекшілеріне.
Ол сондай-ақ опат болғандардың отбасыларына көмекақыны кешіктірмеуді де қатаң тапсырды.
-Бізде қаза тапқандардың қарыздары мен несиелерін жабу ғана емес, олардың отбасы мүшелерінің де займдары мен несиелерін өтеп беру керек. Сіздер орны толмас қайғыға тап болған отбасылардың мұң-мұқтажына жанашырлықпен қарап, олардың балаларының оқуақысының шығындарын да, үйіндегі кәмелетке толмағандарының да қажетті қаржыларын толық төлеп берулерің керек, — деді Қанат Бозымбаев.